दसैँको चहलपहलसँगै काठमाडौं उपत्यकाबाट घर फर्किने यात्रुको संख्या दिनानुदिन बढ्दैछ। तर, मनसुन अझै सक्रिय रहेकाले वर्षा र पहिरोका कारण यात्रा प्रभावित हुन सक्ने भएकाले यात्रुहरूलाई सतर्क रहन आग्रह गरिएको छ। जल तथा मौसम विज्ञान विभागका अनुसार आगामी तीन दिनसम्मकै मौसम पूर्वानुमान विश्वसनीय हुने बताइएको छ भने दसैँ लक्षित विशेष बुलेटिन पछि जारी गरिनेछ।
आगामी तीन दिनको मौसम पूर्वानुमान:
मंगलबार (आज): देशभर भारी वर्षाको सम्भावना न्यून। कोशी, मधेस र बागमती प्रदेशका पहाडी भूभागमा हल्का वर्षा, तराईका कतिपय स्थानमा मध्यम वर्षा सम्भावित। कोशी र बागमतीका पहाडी क्षेत्रमा एक-दुई स्थानमा भारी वर्षा हुन सक्ने।
बुधबार: कोशी, मधेस, बागमती र गण्डकी प्रदेशका धेरै स्थानमा वर्षा। लुम्बिनी र अन्य पहाडी भूभागमा थोरै स्थानमा वर्षा, तराईमा मध्यम वर्षा सम्भावित। कोशी, बागमती र गण्डकीका पहाडी क्षेत्रमा भारी वर्षाको सम्भावना।
बिहीबार: भारी वर्षाको सम्भावना न्यून। अधिकांश स्थानमा हल्का वा मध्यम वर्षा मात्रै हुने अनुमान।
विभागले यात्रामा निस्कनुअघि मौसमसम्बन्धी पछिल्लो जानकारी लिन, सम्भावित अवरोधबारे सचेत रहन र आवश्यक सावधानी अपनाउन यात्रुहरूलाई अनुरोध गरेको छ। यसरी सचेत भएर मात्रै यात्राले सुरक्षित र सहज हुने विभागको भनाइ छ।
