आज असार १५, नेपाली कृषिपरक संस्कृतिमा विशेष महत्व राख्ने दिन, देशभर दही चिउरा खाएर र खेतमा धान रोपेर मनाइँदै छ। किसानले खेतमा हिलो खेल्दै, असारे भाका गाउँदै, छाक जुटाउने मेहनतका साथ यो दिन उत्सवका रूपमा मनाउने गर्दछन्।
असार १५ लाई ‘धान दिवस’का रूपमा २०६२ सालदेखि औपचारिक रुपमा मनाउन थालिएको हो। नेपाल कृषिप्रधान देश भएकाले यस दिनलाई राष्ट्रिय कृषिपर्वको रुपमा स्थापना गरिएको हो। खेतमा रोपाइँसँगै ‘छुपु र छुपु हिलोमा धान रोपेर छोडौँला’जस्ता लोक गीतहरू गाउँदै रमाइलो गर्ने चलन छ।
यो दिन दही चिउरा खाने परम्परा पनि छ। दही चिउरा शरीरमा शीतलता दिनुका साथै पाचनमा सहयोगी मानिन्छ। नेपाली संस्कृतिमा शुभ कामअघि दही प्रयोग गरिने चलन पुरातनकालदेखि चल्दै आएको छ। आयुर्वेदमा पनि दहीलाई स्वास्थ्यवर्द्धक खाद्य मानिएको छ।
हाल देशका केही भागमा वर्षा नहुँदा धान रोपाइँ प्रभावित भएको छ भने कतिपय स्थानमा मलको अभावसमेत देखिएको किसानहरूको भनाइ छ। यद्यपि कृषि तथा पशुपन्छी विकास मन्त्रालयले पर्याप्त मल मौज्दात रहेको जनाएको छ।
यसरी असार १५ नेपाली समाजमा कृषि, संस्कृति र स्वास्थ्यसँग जोडिएको साझा पर्वको रूपमा विकसित भएको छ।
