अत्तरियाः धनगढी उपमहानगरपालिका–१ की राधा चौधरी कुखुरापालन व्यवसायबाट आत्मनिर्भर जीवन बिताउँदै आएकी छन्। आर्थिक कठिनाइका कारण संघर्षपूर्ण जीवन बिताएकी उनले अहिले कुखुरापालन र हाँसपालनबाट मासिक ४० हजार रुपैयाँसम्मको कारोबार गर्न थालेकी छन्।
विगतमा कमजोर आर्थिक अवस्थाका कारण छोरा स्कुल भर्ना गर्नसमेत हम्मेहम्मे परेकी राधाले खोकाको सानो व्यापारसँगै तरकारीखेती सुरु गरिन्। माइती र दिदीको घरबाट ल्याएका केही हाँस र कुखुराबाट व्यवसायको सुरुआत गर्दै उनले किसान बहुउद्देश्यीय सहकारी संस्था, धनगढी शाखाबाट ऋण लिएर व्यवसाय विस्तार गरिन्।
पहिलो किस्तामा ८० हजार रुपैयाँ ऋण लिएर कुखुरा र खोकाको व्यापारमा लगानी गरिन्। त्यसपछि दोस्रो र तेस्रो किस्तामा क्रमशः एक लाख र पाँच लाख रुपैयाँ ऋण लिएर कुखुराको संख्या विस्तार गरिन्। हाल उनीसँग १६० वटा स्थानीय जातका कुखुरा र ५० वटा हाँस छन्। प्रति कुखुरा ७५० रुपैयाँ र हाँस ६५० रुपैयाँमा बिक्री गर्दै उनले मासिक २५ हजार रुपैयाँ बचत गरिरहेकी छन्।
सहकारी संस्था नहुँदो हो त यो स्तरमा पुग्न कठिन हुने उनको अनुभव छ। उनी सहकारीलाई मासिक २० हजार रुपैयाँ सावा–व्याजसहित तिर्दै आएकी छन्। छोराको नाममा १६ वर्षे योजना अन्तर्गत हालसम्म ५ लाख रुपैयाँ जति बचत पनि गरिसकेकी छन्।
राधाको भनाइमा, “काम सानो–ठूलो हुँदैन। संघर्ष र सही कर्मले जीवन सहज बन्छ।” कुखुरापालन व्यवसायलाई अझ विस्तार गर्ने योजना उनले अगाडि सारेकी छन्।
