युएईका अलराउन्डर मुस्तफाले पहिलो एकदिवसिय क्रिकेट खेल जिते सँगै सन्दिपलाई सम्झेर यस्तो भने

काठमाडौं: नेपाललाई हराएपछि यूएईका अलराउन्डर रोहन मुस्तफाले प्रतिक्रिया दिएका छन्। उनले नेपालसँगको म्याच जित्दा खुसी लागेको बताएका छन्। उनले नेपालमा खेल्न पाउँदा पनि खुसी लागेको र नेपाली टिम राम्रै भएको बताएका छन्।

खेलपछि सञ्चारकर्मीलाई प्रतिक्रिया दिँदै उनले ब्याटिङ गर्न सुरुवातमा त्यति सजिलो नभएपनि म्याच जितिएको बताएका छन्। रोहितकुमार पौडेलले युवा कप्तान भएको उल्लेख गर्दै मुस्तफाले आगामी दिनमा उनले राम्रो गर्ने विश्वास व्यक्त गरे।

यसका साथै उनले नेपाली टिमले सन्दीप लामिछानेलाई मिस गरेको पनि औंल्याएका छन्। ‘इमानदारीपूर्वक भन्नुपर्दा उनीहरूले सन्दीपलाई मिस गरिरहेका छन्। सन्दीप मध्य ओभरमा उनीहरूका मुख्य बलर थिए जहाँ उनले विकेट लिइरहेका थिए,’ उनले भने, ‘त्यस्तो राम्रो बलर मिस गर्दा अन्य बलरहरूमा दबाब हुन्छ। यदि मिडिल ओभरमा विकेट लिइएन भने म्याच जित्न गाह्रो नै हुन्छ।’

युएईसँग पहिलो एकदिवसीय अन्तर्राष्ट्रिय (ओडीआई)मा पराजित भएपछि नेपालका कप्तान रोहित पौडेलले सुरुमै विकेट झर्दा लक्ष्य पछ्याउन गाह्रो भएको बताएका छन् । सोमबार टीयू मैदानमा भएको खेलमा नेपाल युएईसँग ८४ रनले पराजित भएको थियो । तीन खेलको शृंखलामा युएईले १-० को अग्रता समेत लिएको छ ।

यसै खेलबाट ओडीआई कप्तानीमा डेब्यू गरेका रोहितले बलिङमा पनि राम्रो सुरुवात गर्न नसकेको बताए । ‘पावर प्लेमा राम्रो बलिङ भएन । हामीले कन्डिसनको प्रयोग गर्न सकेनौं,’ रोहितले भने । यस्तै ब्याटिङमा पनि सुरुको विकेट जाँदा कठिन भएको बताए ।